A Policía Local de Lugo denunciou a catro novos por ouriñar contra a Catedral da capital luguesa, polo que foron propostos para sanción de 900 euros cada un. Segundo informou a Policía Local, na madrugada do sábado ao domingo 31 de outubro efectivos do Grupo Operativo Nocturno sorprenderon a catro novos ouriñando contra a Catedral.
Por iso, tramitou actas de denuncia por infracción á normativa galega de residuos, polo que foron propostos para sanción de 900 euros cada un.
Por outra banda, ás 2,20 horas do pasado domingo axentes municipais realizaron unha inspección nun local de hostalaría situado na Rolda Xosé Castiñeira que foi denunciado por usar un equipo musical a pesar de ter prohibida pola súa licenza a utilización de equipos de reprodución musical.
Ademais, foi denunciado por infracción á Lei de Saúde de Galicia por incumprir o horario de peche establecido para as 1,30 horas, indica a Policía Local, xa que había no interior “unhas 25 persoas consumindo bebidas” e co equipo de música en funcionamento sen ter autorización administrativa.
Ademais, foi identificada a persoa responsable do local, unha camareira e, cando procedían a facer o mesmo cunha segunda camareira, as compañeiras manifestaron que se marchou, pero os policías comprobaron que seguía no establecemento, “escondida no cuarto de limpeza”.
Así, os axentes comprobaron que esta persoa se atopaba traballando de forma irregular, polo que tramitaron acta de denuncia por infracción á Lei de Seguridade Social para o seu traslado á Inspección de Traballo.
OUTRO LOCAL
Ás 2,15 horas do luns día 1 de novembro a Policía Local interveu noutro local na Rúa Nova que estaba con xente no interior a pesar de ter que estar pechado ás 1,30 horas.
Os axentes constataron que había persoas que consumían bebidas dentro. Tras chamar á porta e non abrir, unha vez cesou o ruído o responsable do local abriu e indicou que estaba só.
Na inspección do local a Policía municipal descubriu detrás da barra unha porta no chan que leva a un soto e, tras abrila, acharon escondidos a sete clientes, que foron desaloxados e identificados.
