A deputada autonómica e presidenta da xestora do PP de Vilalba, Sandra Vázquez, asumirá máis protagonismo político e porase á fronte da portavocía do Grupo Municipal Popular.

Así o acordaron os concelleiros durante unha reunión, despois de que o actual portavoz e exalcalde Agustín Baamonde manifestase vontade de dar un paso atrás.

Baamonde explica a súa decisión sinalando que “é un paso lóxico e necesario no momento actual”. “Encaramos o último terzo do mandato municipal e o PP de Vilalba, para constituírse en alternativa de poder, necesita consolidar un proxecto político que dea resposta á actual realidade social de Vilalba articulado a través de ideas, persoas e voces novas”, esgrimiu.

A presidenta da xestora do PP local agradece moi especialmente a Baamonde non só a súa dedicación como portavoz desde o ano 2019; senón tamén como parlamentario e alcalde: “Agustín Baamonde foi un gran alcalde para o noso municipio como demostran todos os proxectos e obxectivos conseguidos para Vilalba grazas ao seu labor”.

“E, agora, temos a honra de seguir contando con el no Grupo Municipal Popular estando na oposición”, celebrou, antes de comprometerse a traballar para que Vilalba poida superar “a parálise” na que –sostén– situouna o actual goberno local, que encabeza a socialista Elba Veleiro.