Unha representación dos responsables das atraccións do recinto feiral do San Froilán entregaron á alcaldesa de Lugo, Lara Méndez, case 500 entradas destinadas a nenos das familias “máis vulnerables”, así como para o persoal municipal “que fixo posible que este ano se puidesen instalar en Lugo”.
Segundo informou o Goberno municipal nun comunicado, o persoal do Concello tamén cedeu as súas entradas para os máis pequenos. O obxectivo, indican os feirantes, é que “ningún neno de Lugo quede sen subir ás atraccións da feira“, para o que doarán máis se é necesario. Ademais, quixeron agradecer así ao Concello “a súa implicación co sector”.
A alcaldesa asegurou sentirse “moi honrada” polo xesto dos feirantes. “Como non podía ser doutra maneira, a nosa vontade é que ese xesto de agarimo, esa solidariedade e xenerosidade, chegue directamente a aquelas persoas ás que a crise sanitaria e económica que trouxo a pandemia provocou un maior impacto”, sinalou a rexedora municipal.
Pola súa banda, a concelleira de Benestar, Olga López, informou de que os tickets se entregarán ás familias que estean dadas de alta no programa de Educación Familiar. Esta iniciativa, lembra o Goberno municipal, súmase á redución dos prezos das atraccións, compromiso por parte dos feirantes a cambio de non cobrarlles este ano as taxas.
