O palista lucense Cristian Toro Carballo proclamouse este mediodía subcampión mundial de K2 200 xunto ao seu homólogo Saúl Craviotto no campionato do mundo que se está a celebrar en Montemor-o-Velho (Portugal). Acadaron a medalla de prata, só superados polos húngaros Mark Balaska y Balazs Birkas, que chegaron á meta en 31.873 segundos, 26 décimas antes que o lucense e o catalán.

Toro e Craviotto son os actuais campións olímpicos da modalidade, que non será distancia olímpica en 2020. De feito, Cristian Toro e Saúl Craviotto competirán dende hoxe ás 17:11 (televisado por Teledeporte) na eliminatoria de K4 500 xunto ao galego Rodrigo Germade e o balear Marcus Walz.