A Policía Local de Lugo interceptou a un condutor con “circulación irregular” que obtivo resultado positivo na proba de alcoholemia, o que leva unha sanción de mil euros e a retirada de seis puntos do carné.

Segundo relatou a Policía Local, na noite do 5 ao 6 de xullo axentes realizaron varios filtros de seguridade viaria e controis no marco dos cales sobre as 00,50 horas foi detectada a “circulación irregular” dun vehículo pola Avenida da Coruña.

Ese condutor obtivo resultado positivo de 0,53 mg/l na proba de alcoholemia, polo que se lle abriu expediente sancionador con multa de mil euros e a retirada de seis puntos do permiso de condución. Ademais, o vehículo foi inmobilizado.

Ademais, a Policía Local interceptou tres vehículos cuxos titulares non presentaban a Inspección Técnica Periódica no prazo debido, puntualizan as mesmas fontes municipais. Por iso, abríuselles expediente sancionador con multas de 200 euros a cada un deles.

Tamén foi detectado un vehículo que carecía de seguro obrigatorio de automóbiles, polo que se iniciou expediente sancionador que leva multa de 1.500 euros.