A situación epidemiolóxica de Galicia segue con tendencia descendente en canto a casos activos de Covid-19, que baixan a 1.346, mentres que os pacientes ingresados por este coronavirus redúcense a 62 –cinco menos– e os novos contaxios detectados mantéñense por baixo do centenar, con 65. Segundo os datos publicados na mañá deste mércores pola Consellería de Sanidade con rexistros ata as 18,00 horas deste martes, continúan 15 pacientes Covid en UCI –sen cambios– e 47 noutras unidades –cinco menos–.
Por áreas sanitarias, a presión hospitalaria descende nas áreas da Coruña e Cee, Santiago e Barbanza, Vigo e Ferrol; mentres que se mantén na de Lugo, Ourense e Pontevedrae O Salnés. Así, na de Lugo segue unha persoa en críticos e catro noutras unidades; e na de Pontevedra e O Salnés, dúas e seis, respectivamente, tamén sen cambios.
MENOS CASOS ACTIVOS
En canto aos casos activos de Covid-19 acumulan 25 xornadas consecutivas de descenso e caen a 1.346, que implican 33 menos que a xornada pasada, ao haber máis altas (98) que contaxios (65). Por iso, mantéñense en niveis de mediados de agosto do ano pasado –o día 15 dese mes había 1.337–. En Lugo descenden ata 175, 13 menos que a xornada anterior pero aínda por enriba de Ourense, Santiago, Pontevedra ou Ferrol. Todo sito despois de rexistrar 7 casos novos nas últimas 24 horas.
POSITIVIDADE GALICIA
En canto á taxa de positividade, continúa por baixo do dous por cento ao situarse nun 1,5%, tras comezar a semana nun 1,1% e ascender lixeiramente a un 1,4% o martes. Deste xeito, mantense por baixo do 5% que a Organización Mundial da Saúde (OMS) fixa para dar por controlada esta pandemia. A última vez que Galicia excedeu esta barreira foi o 15 de febreiro.
