A portavoz da Plataforma Feminista de Lugo, Ana Torrón, protestou este martes contra o arquivo da denuncia de vídeos de mulleres ouriñando na rúa durante as festas da Maruxaina de 2019 en San Cibrao (Cervo) por ser “unha vergoña repugnante”.
As vítimas de ditos vídeos gravados de maneira oculta denunciaron ante a Xustiza a súa difusión tras comprobar que tamén se subiron esas imaxes de 87 mulleres a unha páxina de pago de contido pornográfico. O titular do Xulgado de Instrución número 1 de Viveiro ditou un auto a mediados de marzo no que sobreseía provisionalmente o caso porque non considera “suficientemente acreditado que se cometeu un delito”.
A portavoz da Plataforma Feminista cualificou o arquivo desta causa como “unha vergoña repugnante”. “É que dá medo en mans de quen estamos”, protestou. Torrón afeou que “logo encima queren que as mulleres” denuncien, para seguidamente preguntarse, “para que, se ata os dereitos máis básicos como é o dereito á intimidade se violan reiteradamente e aquí non pasa nada”. “Que exemplo e que mensaxe se dá desde a Xustiza”, lamentou.
Por parte da Plataforma Feminista expresan o seu “apoio incondicional” ao colectivo Xustiza Maruxaina, que denunciou os feitos e programou unha manifestación multitudinaria o pasado domingo en San Cibrao para protestar por este arquivo xudicial.
PREMEDITADO
Ana Torrón aferrouse a que “o tema é delicado” e lembrou que estas gravacións se producen “con cámaras sofisticadísimas que están postas de tal maneira que son profesionais”. “Fóronas a pór a unha rúa que todo o mundo coñece, da que fan uso tanto homes como mulleres. Isto está absolutamente estudado, en plan profesional”, remarca.
Finalmente manifestou que “se isto non é un agravio, que é un agravio entón?, encima gravan a estas mulleres véndoselles as caras, en cambio os homes non aparece ningún o que é unha cousa curiosa”, conclúe a portavoz deste colectivo feminista de Lugo.
