Axentes da Policía Nacional adscritos á Comisaría Provincial de Lugo, encargados da investigación dos delitos relacionados coas persoas, localizaron a unha muller de 67 anos que levaba desaparecida oito anos.
Segundo relatou a Policía Nacional, os feitos foron denunciados na Comisaría de Lugo por parte dos seus familiares, quen manifestaron que levaban oito anos sen ter contacto con esta muller, pero que, dalgunha maneira, “sabían que estaba en bo estado de saúde a través de terceiras persoas”. Con todo, saltou a alarma cando perderon o contacto total coa mesma as persoas que os informaban.
Tras permanecer nesta situación case un mes, indicou a Policía Nacional, os famliares presentáronse en dependencias policiais para informar os feitos. Daquela, os funcionarios encargados deste tipo de localizacións, que xa en datas pasadas localizaron a unha muller perdida nas montañas asturianas, conseguiron localizala nuns días en Madrid e comprobar que “se atopa ben e que se porá en contacto cos familiares”, aseguraron as mesmas fontes. Ao mesmo tempo, foron comunicados estes feitos aos familiares que presentaron a denuncia por desaparición.
