EFE | A Asociación Motorista Lucense (AML) informou de que, trinta e cinco anos despois da última competición, Lugo acollerá o próximo 29 de maio unha proba puntuable para a Copa de España de Mototurismo.

En declaracións a EFE, Manolo Arias, vogal da asociación organizadora, precisou que a Federación Española de Motociclismo acaba de confirmarlle a este colectivo a data para a celebración desta proba, que consiste nun roteiro de 400 quilómetros, con saída e chegada na mesma cidade de Lugo.

“Trátase dun roteiro que os participantes completan nun só día. Son 400 quilómetros. Os motoristas sairán da explanada do Centro Comercial As Termas e chegarán á Praza Horta do Seminario. En principio, está previsto que completen o traxecto en dez ou once horas”, dixo Arias.

“Recuperamos así a competición motociclista en Lugo, aínda que neste caso non se trata dunha proba de velocidade. Consiste en andar en moto e en gozar”, engadiu o vogal da AML.

Manolo Arias precisou que é un “campionato que percorre toda a xeografía nacional” e que serve, ademais, para promocionar “os encantos turísticos e paisaxísticos” de todas aquelas zonas “polas que pasa”.