Traballadoras e traballadores de RTVE en Galicia protagonizaron este mércores 3 de marzo accións de protesta contra o proceso de renovación do Consello de Administración da compañía, que culminou este luns coa publicación no BOE dos nomes dos novos conselleiros. Os profesionais da delegación de Lugo tamén se sumaron a estas reivindicacións.

“Non ao cambio de cromos en RTVE”. Esta frase que se podía ler nos carteis que amosaron hoxe nas súas concentracións fai referencia a que “unha vez máis as formacións políticas estatais optaron pola designación de cargos en base a cotas partidistas” no canto de cumprir as “promesas de despolitilización” dos medios públicos.

Así pois, este mércores o cadro de persoal concentrouse diante dos centros de traballo en Galicia como mostra do rexeitamento a un proceso que, aseguran, non respectou o compromiso de “impulsar un concurso público, baseado na traxectoria, mérito e capacidade dos candidatos coa fin última de garantir a independencia de RTVE”.