Tanto os casos activos como os positivos diarios de coronavirus presentan hoxe unha repunta na área sanitaria de Lugo, xusto ás portas do Nadal. Segundo os datos do Sergas, rexístranse 370 pacientes con infección activa (14 máis ca onte) e nas últimas 24 horas confirmáronse 34 novos positivos.
Pola contra, as hospitalizacións mantéñense estables e con menos presión na UCI do HULA, que hoxe atende a tres pacientes fronte aos catro de onte. O resto de ingresados (dez) permanecen en planta.
En canto aos falecementos, onte Sanidade non comunicou ningún relativo á área de Lugo, polo que a provincia continúa con 146 mortes. Con todo, o Sergas computa só 144 (non inclúe o deceso de dous usuarios de residencias que faleceron en Santiago de Compostela).
Por outra banda, ata o momento curáronse 6.360 persoas e realizáronse 120.792 PCR, o que supón que nesta última xornada se fixeron 1.206 probas (case 400 máis ca o día anterior e máis do dobre ca dous días antes).
