EFE | Luz verde para o convenio de colaboración entre a Deputación Provincial e a Diócese de Lugo, por un importe total de 300.000 euros, para executar obras de mellora en diversos templos da provincia de Lugo, entre eles a propia catedral da capital lucense.
O presidente da Deputación de Lugo, José Tomé, precisou que ese convenio de colaboración contempla unha achega por parte da institución provincial de 150.000 euros, mentres que a Diócese achegará outro tanto. As obras previstas serán executadas no prazo de dous anos.
Con respecto ás melloras na Catedral de Lugo, o orzamento das obras é de 93.000 euros, e terán o obxectivo de mellorar o acceso ás persoas con mobilidade reducida ao templo. As actuais ramplas de madeira serán substituídas por outras de granito, acordes coa estética da basílica. Así mesmo, ese investimento tamén permitirá mellorar o atrio frontal da catedral.
