Un total de 21 proxectos compiten neste 2020 aos VIII Premios Bioga, convocados polo Clúster Tecnolóxico Empresarial das Ciencias da Vida (Bioga) para incentivar o desenvolvemento de iniciativas empresariais vinculadas á biotecnoloxía. Entre os candidatos, hai dous proxectos lucenses: IBoneLab , de Lugo capital; e Innogando , de Cospeito.
IBoneLab é unha compañía de Lugo especializada no estudo da integración de biomateriais en tecidos vivos. Pola súa parte, Innogando, con sede en Cospeito, desenvolve tecnoloxía informática que favorece o benestar dos animais nas explotacións gandeiras, ademais de facilitar a xestión dos propietarios de granxas.
Os Premios Bioga, que contan co apoio da Xunta a través da Axencia Galega de Innovación, entregaranse o vindeiro 10 de decembro nunha gala con capacidade limitada e retransimisión virtual. Distinguen tres modalidades: premio á empresa máis innovadora, premio á máis competitiva e premio á mellor idea empresarial neste 2020.
Completan a listaxe de candidatos Beta Implants (Salvaterra), BFlow (Santiago), Biopranaworld (Pontevedra), Chemosapiens (A Coruña), Creativigo (Vigo), DIVERSA (Santiago), EuroEspes (A Coruña), FlowReserve (Santiago), Galacteum (Melide), Gerifarma (A Coruña), Glecex (Ourense), Gurung Atlantic Blending Co (Ourense), KeyBiological (Vigo), Libera Bio (Santiago), Ozoaqua (Santiago), Ozovet (Santiago), Stelabus (Santiago) e Terapia Antimetastásica (A Coruña).
