A portavoz do goberno da Deputación de Lugo, a socialista Pilar García Porto, anunciou este venres que as novas residencias de maiores dos municipios de Castroverde e de Pedrafita do Cebreiro botarán a andar o próximo ano.
Así o confirmou na rolda de prensa posterior á xunta de goberno provincial, durante a cal se aprobou a adxudicación da prestación básica dos servizos do centro de Castroverde, por 1 millón de euros en dúas anualidades. Nesta licitación inclúense os servizos de cociña, limpeza e asistencia básica, ademais de barbería e quiropedia, o que podería levar á súa apertura antes de que conclúa 2020.
No caso da residencia de Pedrafita, aprobouse a adxudicación da subministración e equipamento para lavandaría e artigos de cociña, por un importe de máis de 52.000 euros. A súa apertura podería producirse en febreiro, segundo avanzou García Porto.
COMERCIO DE NADAL
Polo demais, a portavoz do goberno da Deputación informou da aprobación dunha axuda por 52.000 euros para a Federación Galega de Comercio, co fin de “dinamizar as compras de Nadal nos negocios da provincia”.
“Seguimos traballando da man dos propios sectores produtivos para axudar na recuperación do emprego e da actividade económica ante o impacto da crise sanitaria”, explicou García Porto.
Tamén na xunta de goberno, o portavoz nacionalista, Efrén Castro, explicou as bases para inscribirse no Mercado de Nadal, fronte ao Pazo de San Marcos.
Serán 14 os postos, coa novidade este ano de que se incorpora unha caseta de artesanía alimentaria, ademais doutro posto que será “unha especie de exposición rotativa dos produtos” artesáns que se pon á venda ata despois de Reyes.
Finalmente, a administración provincial acordou na xunta de goberno achegar máis de 143.000 euros á dotación de novo material informático para o Centro Asociado da UNED en Lugo.
