O Club Baloncesto Breogán anunciou a fichaxe do pívot ucraniano Volodymyr Gerun para a vindeira tempada en ACB. Procede do Fútbol Club Barcelona B, en LEB Ouro. Foi o xogador máis valorado da pasada LEB Ouro con 21.13 de media. O pívot, de 2.10 metros de estatura e 24 anos, promediou 14.8 puntos, 7.9 rebotes, 1.6 asistencias, 0.9 tapones e 0.5 recuperacións en 29´18″ por partido.
Previamente, Gerun xogou no Viten Getafe en LEB Prata na tempada 2015-2016 para marchar en decembro de 2015 a Força Lleida Club Esportiu, en LEB Ouro. Na campaña 2016-2017, xogou no Club Baloncesto Clavijo, tamén en LEB Ouro, e dende 2016 até 2018 no Barça B, en LEB Ouro.
É a primeira fichaxe do Breogán para a vindeira tempada. Os bases Ricardo Úriz e Christian Díaz; os escoltas Salva Arco e Sergi Quintela; o aleiro Johan Löfberg; e os pívots Emir Sulejmanovic e Herve Kabasele, recuperándose dunha lesión, teñen contrato en vigor nun equipo no que continúa Natxo Lezkano como primeiro adestrador e Quique Fraga é o novo director deportivo.
