Un home foi detido en Lugo por un delito de violencia de xénero logo de ameazar e tentar atropelar a súa exparella, que se tirou do coche en marcha para fuxir do agresor.
A actuación, realizada en conxunto entre a Garda Civil de Lugo e a Policía Local comezou algo antes da medianoite do 5 de novembro. Unha patrulla foi enviada á Avenida de Madrid ao saberse que unha persoa se botara dun coche en funcionamento mentres o condutor tentaba atropelala en varias ocasións.
Un testemuño explicou aos axentes que el mesmo interpuxera o seu propio vehículo no medio para evitar que se producise o atropelo. O coche implicado deuse á fuga, segundo sinalou a Policía Local, pero puideron dar coa matrícula.
AMEAZAS
No entanto, os axentes auxiliaron a muller, que estaba “moi nerviosa, con erosións nas mans e chorando”. A vítima indicou que pasara un día coa súa exparella e, ao ir no coche, este ameazáraa ” de morte”, polo que ela decidiu “tirarse” do coche.
A muller negouse a ser asistida polo 061 e foi trasladada a dependencias policiais, onde manifestou a súa intención de presentar denuncia destes feitos no Cuartel da Garda Civil de Sarria, xa que quería ir para a súa casa.
Ademais, a Policía Local indicou que a muller recibiu a chamada dun familiar que lle comunicou que a súa exparella estaba no portal do seu domicilio preguntando por ela. Por iso, coordinouse unha actuación conxunta da Policía Local de Lugo e da Garda Civil. Foron axentes do Instituto Armado os que localizaron e detiveron a este home.
