O alcalde de Outeiro de Rei, o popular José Pardo Lombo, destacou que o Concello intensificará a desinfección tras o positivo detectado entre dous traballadores da residencia de maiores desta localidade.
O rexedor mostrou a súa “preocupación” ante dous positivos por COVID-19 entre os traballadores da residencia de maiores DomusVi situada neste municipio. Pardo Lombao puntualizou que “calquera tipo de positivo sempre é preocupante”. “É un tema imprevisible, en que non sabemos como acaban estas cousas”, abundou.
Con todo, o rexedor ten a “esperanza” de que se “resolva ben, aínda que ultimamente danse moitos contaxios moitos deles, afortunadamente, son pouco graves”, sinalou. “Volveremos ao tema da desinfección, que fixemos polas rúas e evidentemente concienciar o máximo posible aos veciños de que tomen medidas como gardar a distancia de seguridade, uso da máscara e de hidroxeles”, subliñou.
“Imos intensificar máis a desinfección nas rúas, que xa fixemos na primeira onda. Nós o que facemos é seguir as recomendacións das autoridades sanitarias”, concluíu.
