A cidadanía de Parga (Guitiriz) non queda cos brazos cruzados ante o peche parcial do consultorio médico coa escusa do coronavirus e durante toda esta semana mobilizarase para esixir a súa completa reapertura. Piden o apoio de toda a veciñanza, empresarios da zona e xente doutros concellos.

A primeira cita está prevista para mañá, martes 23, ás 10:00 horas diante do centro médico de Parga. Ata alí levarán as súas protestas, segundo acordaron a finais da semana pasada nunha asemblea veciñal celebrada no campo de fútbol da localidade.

O xoves 25 as reivindicacións traspasarán as fronteiras municipais e chegarán ata a capital da provincia, saída para a que fletarán autobuses gratuítos dende Parga. Será ás 10:00 horas, na explanada do Hospital Universitario Lucus Augusti (HULA).

Alí volverán expoñer o seu desacordo coa medida do Sergas de deixar dispoñibles unicamente o servizo de enfermaría e de atención a enfermos crónicos. O resto de usuarios terían que ser atendidos agora no PAC de Guitiriz, un centro xa acusado pola saturación previamente, segundo denuncian dende a Plataforma Parga Non Se Divide. “Quen pretenda atacar Parga vai atopar a todo o pobo en pé diante del”, advertían.