Despois duns tres meses de parón por mor da emerxencia sanitaria, volven as actividades relacionadas co turismo de proximidade para non deixar de descubrir a provincia. Guido Guía e os seus coñecidos paseos guiados non se fan de rogar e regresan con novas datas fixadas no calendario. 

De feito, este venres 12 de xuño, foi o día do soñado paseo do #LugoFavorito, unha volta polos recunchos preferidos duns 500 veciñas e veciños. O vindeiro domingo 14 será a quenda dun clásico: #OLugoMenosCoñecido.

De cara á semana seguinte, o ritmo non para e ábrese o camiño a #RedescubrindoLugo, un proxecto polo cal se ofertan xornadas viaxeiras por distintos puntos da provincia. Nesta primeira ocasión, o sábado 20, o destino será O Piornedo (Cervantes).