Veciños e veciñas de Vilar, en San Lourenzo de Pousada (Baleira), compartiron nas redes sociais un vídeo cheo de mensaxes de ánimo para facer fronte á corentena polo coronavirus. “Este ano brindaremos no San Lourenzo. Todo vai saír ben!”, pódese ler nun dos carteis que amosan.

Canda as mensaxes motivadoras, tamén aparecen outras que optan pola vía do humor: “Atrás, coronavirus! Ou non ves a vara?“, escribiu un veciño. “Temos defensas. Vas ter que marchar”, di o cartel dunha muller, rodeada de botes de lixivia e produtos de limpeza.

Tamén hai oco para facer un chamamento á responsabilidade, así que moitos dos carteis amosan un #QuedaNaCasa (ou “Pasa pra casa. Non ves o parte?“).