O servizo de teleasistencia domiciliaria que ofrece a Deputación de Lugo amplíase dos 1.500 aos 1.700 usuarios, segundo os datos ofrecidos este venres polo deputado de Promoción Económica e Social, Pablo Rivera, tras a xunta de goberno provincial.
Rivera anunciou a adxudicación, por catro anos, deste servizo “que asume directamente e en exclusiva a Deputación, por un importe total de máis de 290.000 euros anuais“.
O deputado socialista destacou que coa teleasistencia se permite “estar preto desas persoas dependentes, e ante esa praga de despoboamento que se produce no rural, permite a esas persoas estar monitoradas, estar controladas e darlles un plus de seguridade á hora de poder seguir facendo a súa vida no rural“.
“Este seguimento increméntase un vinte por cento respecto ao anterior contrato, pasando duns 1500 beneficiarios a máis de 1700 usuarios en toda a provincia”, pormenorizou.
Co servizo incorpóranse “unha serie de novidades, desde o punto de vista tecnolóxico”, indicou, e así se incluirá un “sistema de teleasistencia avanzada” que contemplará “dispositivos periféricos, como detectores de caídas, detectores de gases, de fumes, de movemento desas persoas”, puntualizou o deputado de Promoción Económica e Social.
Pablo Rivera avanzou que tamén “se desenvolverá un proxecto piloto, que é un servizo de teleasistencia móbil para que o propio usuario e as súas familias, a través do seu dispositivo móbil e cun sistema de xeolocalización, teñan totalmente monitorado as persoas as 24 horas do día, os 365 días do ano”.
“Como parte dese proxecto piloto vanse introducir, ademais, dispositivos para aquelas persoas que teñan dificultades de comunicación verbal ou auditiva”, concluíu.
