A empresa Lácteos Casa Macán confía en que as autoridades sanitarias dean a súa autorización para retomar a produción na fábrica de Tabaoda, cuxa actividade foi suspendida cautelarmente por “incumprimentos de limpeza”.

O propietario de Casa Macán, Eladio Rigueira, confesou sentirse “sorprendido” por todo “o show que se montou” arredor da súa empresa como consecuencia da alerta sanitaria decretada no día de onte. Rigueira estrañouse de que as autoridades ordenaran a retirada de todos os produtos desta compañía, pois “non hai ningún contaminado”.

Agora ben, admitiu que “é certo que a fábrica tivo que estar parada dous días”, pero reduciu a situación a un “problema de etiquetaxe” e a “unha serie de deficiencias estruturais”.

“Non entendo que se forme todo este alboroto, e máis cando esperamos que hoxe mesmo nos dean a autorización para renovar a produción”, insistiu. En todo caso, recoñeceu que a empresa quedou seriamente danada por esta situación e a súa imaxe de marca “moi deteriorada”. “Non creo que sexamos capaces de coller outra vez impulso. Agora que lle contamos á xente e aos traballadores? É o que hai”, lamentouse o empresario.

VALORACIÓN DO PRESIDENTE DA XUNTA

Ante esta situación, o presidente da Xunta, Alberto Núñez Feijóo, defendeu a utilidade, “independencia” e “rigor” das inspeccións para “protexer aos consumidores”. Confesou non coñecer o expediente concreto, así como o “alcance e contido” das irregularidades atribuídas á empresa, pero sinalou que a compañía se pode acoller ao dereito de presentar unha alegación.

O “obxectivo fundamental” é “protexer a calidade dos produtos galegos”, afirmou. “Ás veces, as inspeccións poden dar algún desgusto a medio ou curto prazo, pero teñen máis vantaxes que inconvenientes”, defendeu.