A ata agora titular do Xulgado de Instrución Número 1 de Lugo, Pilar de Lara, cesou este xoves no seu destino actual, sen esperar ao recurso de reposición que presentara o seu avogado contra a sanción interposta polo CXPX.
O avogado, Agustín Azparren, confirmou o cesamento da xuíza Pilar de Lara, á vez que se mostrou sorprendido de que se levase a cabo con tanto “apremio”. Vinculou esa decisión cunha reunión do Consello Xeral do Poder Xudicial (CXPX) en Pontevedra.
A propia xuíza asinou o cesamento na mañá deste xoves e recolleu as súas pertenzas do xulgado no que permaneceu durante doce anos, desde a súa chegada en 2007. Unha sanción interposta polo Consello Xeral do Poder Xudicial por mor de “dilacións indebidas” supuxo a perda de destino desta xuíza. Agora Pilar de Lara deixará de exercer durante sete meses e un día, para despois pasar a concursar para un novo xulgado.
RECURSO
A maxistrada Pilar de Lara Cifuentes presentou ante o Tribunal Supremo un recurso, que probablemente non terá resolución ata dentro dun ano, segundo estimou o seu letrado.
Agora, o novo xuíz ou xuíza terá que facerse cargo das múltiples macrocausas que instruía De Lara. Entre elas, a ‘Carioca’, a ‘Pokémon’ ou o caso Garañón.
AUTO POKÉMON
Pilar de Lara despídese do seu posto en Lugo un día despois de transcender un auto con data de 23 de xaneiro no que rexeitou a petición de Fiscalía de dividir a parte galega da ‘Operación Pokémon’, aínda que accedeu a inhibirse das pezas que atenden os feitos rexistrados en Cataluña e Baleares.
