Lugo dispón desde este mércores do “primeiro autobús híbrido” dentro dunha frota total de 23 autocares urbanos que operan na cidade.
O primeiro tenente de alcalde, o nacionalista Rubén Arroxo, puntualizou que este vehículo “forma parte desa renovación dos buses que fai o Concello de Lugo cando cumpren dez anos”.
Respecto das particularidades do autobús, Arroxo puntualizou que conta con 28 asentos e 48 prazas de pé, ademais de dúas ramplas para minusválidos. O autocar cubrirá o traxecto da actual liña seis (Montirón-A Cheda) e as súas características contribuirán a reducir a contaminación e o consumo de combustibles fósiles.
O primeiro tenente de alcalde tamén aproveitou para “animar a xente a que colla o transporte público”. “Cada vez que se colle o transporte público minórase o uso de vehículos privados, e por tanto, redúcese moito a contaminación”, subliñou.
ACCESO RESTRINXIDO NA ROLDA DA MURALLA
Por outra banda, adiantou que se traballa para “acoutar” a presenza de vehículos contaminantes no centro histórico da cidade e na Rolda da Muralla, aínda que xa deixou entrever que non se aplicará este ano.
“Sabemos que hai unha directriz europea que vai marcar iso, e Lugo vai ter que irse adaptando a todas esas medidas. É un debate que temos que dar, para que a xente se vaia concienciando de que os centros históricos das cidades van ter que apostar por reducir o consumo de gases contaminantes”, sinalou Rubén Arroxo.
