O portavoz do Grupo Municipal do PP de Lugo, Ramón Carballo, avanzou que os populares defenderán no pleno unha moción de urxencia dirixida a que o goberno municipal, coa alcaldesa socialista Lara Méndez á fronte, mostre o seu “apoio” á Xunta na reclamación ao Executivo que dirixe Pedro Sánchez dos 200 millóns do IVE.

“Pediremos o apoio da alcaldesa para que Sánchez pague a débeda con Galicia xa que, pola contra, sería cómplice no seu agravio cos lucenses”, sinalan os populares lucenses nun comunicado.

Carballo defendeu que é preciso declarar o apoio do Concello de Lugo á reivindicación da Xunta ante o Goberno de España para que ingrese as contías do IVE non liquidadas correspondentes ao exercicio 2017.

En canto á urxencia, o dirixente popular xustifícaa polas “inadmisibles” declaracións realizadas pola ministra de Facenda, María Jesús Montero, nas que aseguraba que “esa era unha cuestión que tocaba en 2019” e que “xa se perdeu a oportunidade de poder resarcir a débeda con Galicia”.

Nesta conxuntura, espera “unha fronte común” dos grupos da corporación lucense, xa que o impacto desta decisión do Goberno central “afecta directamente ao financiamento autonómico e pode supor unha perda de recursos para os veciños” do municipio.