Efectivos da Unidade Territorial de Policía de Barrio da Policía Local de Lugo detiveron na tarde do sábado a unha muller duns 34 anos de idade como presunta autora dun delito de violencia no ámbito familiar por malos tratos á súa nai.
Segundo informou a Policía Local, a detención levouse a cabo sobre as 19:45 horas do pasado sábado 18 de abril nunha vivenda na Avenida da Coruña. Axentes acudiron ao lugar tras recibir o aviso de posibles malos tratos. Ao acceder ao interior da vivenda o padrasto da moza manifestou que durante todo o día levaba ameazándoos con agredilos, tanto a el como á súa nai.
O home asegurou que chegou a propinarlle un “forte golpe no peito”, condutas que se repiten a diario, segundo manifestou o padrasto.
Por iso, os axentes procederon á detención desta nova, que foi trasladada a dependencias policiais para instruír as dilixencias remitidas ao xulgado competente nesta materia.
