O Concello de Guitiriz acordou este venres prohibir consumir auga da traída polo alto nivel de ferro detectado desde hai un par de semanas, polo que ata esta xornada recomendábase non inxerila.
Fontes municipais explicaron que as analíticas do laboratorio constataron que persiste o alto nivel de ferro. En concreto, unha nova analítica da auga do núcleo urbano, realizada polo laboratorio contratado polo Concello, confirmou que “o nivel de ferro presente continúa estando moi por enriba do recomendable (1.361 mg/l), polo que o goberno local prohibe o consumo de auga”, destacou o Consistorio.
O goberno municipal acordou, entre outras medidas a curto prazo, realizar unhas obras para que a auga da traída non pase polo pantano. Así, o luns comezarán os traballos polos que se desviará a subministración, “facendo uso dunha antiga rede de circunvalación”, concretaron as mesmas fontes.
Así mesmo, a alcaldesa da localidade, Marisol Morandeira, vai solicitar unha reunión con Augas de Galicia para abordar conxuntamente a situación da auga neste municipio.
Outra das medidas acordadas polo goberno local foi a de compensar aos veciños no recibo deste trimestre, no que non se lles cobrarán os días que dure a incidencia.
DESCULPAS
“Os controis propios realizados diariamente polo técnico municipal de medio ambiente, que reflectían uns niveis de ferro moito menores que o alcanzado hoxe, e os axustes levados a cabo durante as últimas semanas nos filtros instalados na depuradora, facían esperar outro tipo de resultados”, manifestou o goberno local.
Por iso, ante a “gravidade da situación” constatada nesta segunda análise dos niveis de ferro na auga realizada polo laboratorio contratado polo goberno local, decidiuse “prohibir aos veciños de Guitiriz o consumo de auga da traída ata que a situación se solvente”.
A alcaldesa de Guitiriz pediu este venres desculpas aos veciños e declarou que “desde o goberno local se continuará traballando sen descanso para liquidar esta recorrente problemática que afecta a auga”.
Ata este venres, o Consistorio mantiña a recomendación de non consumir a auga da traída, que agora pasa a prohibición, en vigor desde o pasado día 11 cando informou de que na última analítica da auga recibida polo laboratorio contratado polo Concello de Guitiriz “se detectou un alto nivel de ferro”.
