O Goberno central destinará un total de 1,2 millóns de euros á construción da nova Oficina de Emprego no barrio da Residencia de Lugo.
Así o destacou este luns a subdelegada do Goberno na provincia, Isabel Rodríguez, que asegurou que a creación desta nova oficina é “froito da colaboración” entre dúas administracións, o Estado e a Xunta.
“Unha relación que debe caracterizarse sempre pola lealdade institucional e que debe ter como único obxectivo o interese público e a prestación dos mellores servizos á cidadanía”, apuntou.
Deste xeito, subliñou que o Goberno colabora economicamente nesta obra con dúas subvencións do chamado Plan Renove, un por importe de 702.000 euros e outra de 525.200.
Segundo lembrou a Subdelegación, este novo edificio que sacou a contratación a Xunta conta cun orzamento de licitación de 2.565.672 euros.
