Primeira semana de maio e xa comezaron os grandes lumes. Logo de varios días de calor e seca, tres grandes lumes, xa estinguidos, afectaron aos municipios de Guntín (Lugo), Vila de Cruces (Pontevedra) e San Xoán de Río (Ourense). Estes incendios forestais rexistrados entre o luns pola tarde e a mañá do martes queimaron máis de 120 hectáreas.
O incendio de Guntín iniciouse ás 15,51 horas do luns na parroquia de Ferreira de Pallares e quedou extinguido ás 22,41 horas da mesma xornada após arrasar 48,72 hectáreas, delas 12 de monte arborado e 36,72 de raso, precisou a Consellería de Medio Rural. Na extinción deste incendio forestal participaron catro axentes, 10 brigadas, cinco motobombas e dous helicópteros, indicou o departamento de Medio Rural.
Na provincia de Ourense, un incendio forestal con varios focos queimou este martes unhas 45 hectáreas no municipio de San Xoán de Río. Segundo a mesma fonte oficial, este lume quedou controlado ás 16.49 horas deste martes após afectar a 24 hectáreas de arborado e 21 de superficie rasa.
Así mesmo informou o goberno autonómico doutro lume, este en Pontevedra. Ás 1,55 horas deste martes quedou extinguido o lume declarado na parroquia de Toiriz, no concello de Vila de Cruces. Comezou ás 18,39 horas do luns e queimou unha superficie de 30 hectáreas de monte arborado. Para extinguir este incendio foron mobilizados oito axentes, 15 brigadas, seis motobombas, unha pa e catro helicópteros.
