A protesta, convocada pola plataforma Galiza, un futuro sen carbón, forma parte da alianza europea Europe Beyond Coal. “Demandamos do Goberno de España unha data de peche, porque España é o único país de Europa occidental que non a ten, Francia en 2021, Reino Unido, Italia, Irlanda en 2025, Portugal en 2030 e España non, e iso non permite planificar incluso unha solución para os traballadores que queden sen emprego”, explicou Manoel Santos, un dos impulsores de acción reivindicativa.

Dende a organización inciden na necesidade de que se planifique o cambio cara ás enerxías renovables, para poder reconducir o emprego que se destruiría. “Se agora pomos unha data, 2025, hai tempo para reconducilo, hai casos de éxito en Europa con renovables, novas tecnoloxías”, agregou. O plan do executivo central pasa por non prolongar a vida útil alén de 2030 no caso das Pontes, mentres que o máis probable é que Meirama peche en 2020.