Axentes da Policía Nacional adscritos á Brigada de Policía Xudicial da Comisaría Provincial de Lugo imputaron a un home de 45 anos, con mais de 30 arrestos, o roubo con forza de dous establecementos hostaleiros da cidade. Actualmente o imputado esta en prisión por outros delitos.
Segundo informou a Policía Nacional, por denuncias presentadas o pasado día 31 de xaneiro e 3 de febreiro na zona do Parque de Rosalía de Castro, unha persoa entrou nun bar e levou ao redor de 1.000 euros. Na segunda denuncia, por feitos ocorridos na zona da Praza do Campo, consta que violentaran a xanela exterior e desde alí se apoderaran de case 800 euros en metálico.
Despois das investigacións pertinentes, así como analizados todos os vestixios atopados nos lugares dos feitos e recibidos os resultados das peritaxes realizadas polos laboratorios de Policía Científica da Xefatura Superior de Policía de Galicia, púidose determinar a autoría de ambos os roubos.
O imputado actualmente atópase en prisión, xa que foi detido o pasado día 6 de febreiro despois de perpetrar varios roubos na cidade de Lugo.
