Un bebé de apenas dous meses e con signos de sufrir malos tratos, debido ás lesións presentadas en varias partes do seu corpo, atópase ingresado grave na UCI do hospital de Lugo e os seus pais, sobre os que pesan as sospeitas, resultaron detidos.

A alarma dérona os propios sanitarios e é un xulgado desa cidade o que agora leva a causa, informaron a Efe fontes da investigación, as cales indicaron que unha vez activado o protocolo, pediuse unha orde de acceso á vivenda que habitaba esta familia.

Unha vez alí, quedou constatada a insalubridade dese fogar, cun cheiro nauseabundo, até tal punto que se requiriu a presenza de operarios de limpeza para retirar todo o lixo acumulado. Os servizos sociais da Xunta asumiron a tutela do menor.