O xornalista Álex Vázquez (Narla – Friol, 1997) di non ter moi claro se anda detrás das historias ou se son as historias as que andan detrás del. O caso é que xoga a pillalas e a darlles forma, como vén de facer agora con ‘Eramos Poucos’, un proxecto web sobre a evolución socio-económica da Montaña de Lugo.
“Eu tamén nacín nunha zona na que eramos poucos e, ao contrario ca no dito popular, agora somos aínda menos“, di para explicar o título da reportaxe multimedia, que acaba de ser presentada como Traballo de Fin de Máster na Facultade de Comunicación da USC. O proxecto non xorde por sorpresa, senón que conflúe do seu interese por explorar o despoboamento rural —como xa fixera cunha serie de fotografías no Instagram— e outro traballo previo co que visitara a comarca dos Ancares (Entrelinguas).
EXPERIENCIA INTERACTIVA
Dende a súa perspectiva de xornalista mozo, entende que os medios de comunicación non sempre lle dan unha cobertura mediática ampla á Montaña de Lugo. “E está ben falar dun mesmo, do que se vive e do que se é”. Así, en ‘Eramos Poucos‘ constrúe un relato sobre o que foron, o que son e o que queren ser nos concellos de Baleira, As Nogais e Cervantes.
“Como evolucionou esta zona? Cales son as súas principais problemáticas? Existen oportunidades?”, preguntouse ao inicio da súa andaina. Estas cuestións vanse respondendo a través de mapas históricos que amosan a vista de paxaro os cambios que trouxeron canda si a autovía A-6 ou a estrada N-VI. Completan o cadro varias infografías e as voces dos verdadeiros protagonistas —as veciñas e veciños— recollidas nun vídeo interactivo.
CAMIÑOS DE FUTURO
“Alí a xente ten moita vontade de que o seu concello tire para adiante. Hai moitos proxectos e asociacións para dinamizar a zona”, sostén Vázquez. A vía Künig, o turismo sostible e de natureza ou a posta en valor do patrimonio son algúns dos camiños que se abren como “potencialidades”, máis alá do momento presente no que a “falta de recursos e infraestruturas” lastran unha comarca especialmente afectada pola caída demográfica.
Pero como Álex é amigo de darlle unha volta a todas as expresións, conclúe o traballo cunha frase que reflicte o alento da Montaña lucense: “a esperanza é o primeiro que se garda”.
Ver esta publicación en Instagram
