A alcaldesa de Lugo, Elena Candia, e os concelleiros Damián Carballo e Mar Carballas mantiveron un encontro de traballo con representantes das asociacións que fan posible cada ano o Arde Lucus, co obxectivo de iniciar a coordinación da próxima edición, que se celebrará do 18 ao 21 de xuño de 2026 e coincidirá co 25 aniversario desta festa de recreación histórica. Durante a reunión abordáronse diferentes cuestións organizativas e administrativas vinculadas á colaboración co tecido asociativo, destacando a vontade do novo goberno municipal de traballar desde o diálogo, o consenso e a planificación.
O executivo local trasladou ás asociacións que son a parte máis importante do Arde Lucus e que calquera decisión que lles afecte deberá ser estudada, dialogada e planificada con tempo suficiente, consensuando os cambios que poidan adoptarse. Durante o encontro, tanto as asociacións como o goberno municipal coincidiron na importancia de traballar desde este momento nunha edición especial do Arde Lucus con motivo do seu 25 aniversario.
LUGO MONUMENTAL
A alcaldesa de Lugo, Elena Candia, e a concelleira Cristina Sanz recibiu no Concello a representantes da asociación Lugo Monumental nun encontro de traballo solicitado pola propia entidade e ao que o goberno municipal deu resposta inmediata.
Durante a reunión abordáronse diferentes asuntos relacionados coa situación do centro histórico, entre eles os problemas de mobilidade derivados da implantación da Zona de Baixas Emisións, o futuro da antiga estación de autobuses, a posibilidade de impulsar unha dotación deportiva no edificio da antiga OJE ou a recuperación dos quioscos que permanecen sen uso desde o ano 2011
