O gromo de Vilalba dispara os casos diarios da provincia: 167 novos positivos

É a cifra máis elevada de toda a pandemia na área sanitaria lucense. O dato positivo é que se reduce a presión hospitalaria na Mariña e en Monforte.

Proba de COVID19 | ALX

O gromo da residencia de Vilalba, con 132 positivos entre traballadores e usuarios, disparou a cifra de casos diarios de coronavirus en Lugo, que hoxe alcanza un récord ao rexistrar 167 novos positivos. É o dato máis elevado dende o inicio da pandemia. Do mesmo xeito, tamén soben os casos activos ata os 1.194 (122 máis ca no día de onte).

Non obstante, percíbese unha baixada na presión hospitalaria, con 47 persoas ingresadas (tres menos). O Hospital Universitario Lucus Augusti (HULA) atende 29 pacientes en planta e cinco na UCI; o da Mariña coida de 8; e o de Monforte, de 5.

Por outra banda, no histórico da provincia documéntanse 115 falecementos relacionados coa pandemia. Ademais, ata o momento curáronse 4.466 pacientes e fixéronse 95.854 PCR, o que implica que na última xornada se realizaron 845 probas.

GALICIA

No conxunto galego, os casos de Covid-19 confirmados por PCR nas últimas 24 horas aumentan a 685 e os casos activos sitúanse en 9.086. Sanidade indica que a positividade das PCR realizadas sobe ata o 12,2% e todas as áreas sanitarias continúan por enriba do 5% que marca a OMS.

DEIXAR UN COMENTARIO

Please enter your comment!
Please enter your name here