O número de casos activos por coronavirus na provincia de Lugo baixa ata os 1.072, 28 menos ca onte, segundo o reconto ofrecido este luns polo Servizo Galego de Saúde (Sergas). Redúcese tamén o número de contaxios, malia seguir elevado: nas últimas 24 horas confirmáronse 51 novos positivos a través de PCR.
Do total de contaxiados, 50 persoas permanecen hospitalizadas (nove menos). O Hospital Universitario Lucus Augusti (HULA) atende 29 pacientes en planta e cinco na UCI; o da Mariña coida de 10; e o de Monforte, de 6.
Por outra banda, no histórico da provincia documéntanse 115 falecementos relacionados coa pandemia. No día de onte, Sanidade non notificou ningunha morte na provincia de Lugo.
Ademais, ata o momento curáronse 4.420 pacientes e fixéronse 95.009 PCR, o que implica que na última xornada se realizaron 784 probas.
GALICIA
No conxunto da comunidade galega volven subir os positivos diarios ata os 667, ao dispararse os contaxios detectados en Vigo. Esta área sanitaria informou de máis do 40% dos casos confirmados por PCR nas últimas 24 horas en Galicia. O total de casos activos soben en 47 e sitúanse en 9.098.
En cambio, segundo os últimos datos do Sergas, diminúe lixeiramente a presión asistencial, con 472 hospitalizados (catro menos) e 101 persoas na UCI (un menos).
En Galicia faleceron dende o inicio da pandemia 1.107 persoas. Onte comunicáronse 15 decesos.
