A asociación Terra Chá Sostible ven de presentar nesta segunda semana do mes de maio diante da xefatura territorial de Medio Rural e Mar de Lugo dúas denuncias por plantacións ilegais de eucalipto en terras agrarias e praderías na comarca da Terra Chá.
As denuncias abranguen máis de 64 parcelas e cubren máis de 100 hectáreas tan só nos concellos de Begonte, Outeiro de Rei, Lugo, Castro de Rei e Friol. “Por culpa da falla de control por parte da administración, as plantacións ilegais en terras agrarias , as talas das nosas fragas e a roturación e destrución de matogueiras e outros hábitats autóctonos para a súa posterior plantación con esta especie exótica invasora estanse a disparar na comarca“, denuncia a entidade nun comunicado.
Ademais, apunta que esta situación está a causar un problema de escaseza de terras para os gandeiros , subindo o prezo das mesmas e facendo que as parcelas existentes “estean sufrindo unha excesiva intensificación, con gran uso de pesticidas e emendas químicas que rematan contaminando as augas e acuíferos”. Tamén denuncia que se están producindo tallas de carballeiras para convertelas en terras agrícolas, “mentres que moitas terras agrícolas estánse transformando ilegalmente a eucalipto”.
“MORATORIA PARA O EUCALIPTO”
Neste sentido, di que o feito de que a Xunta de Galicia acabase de aprobar a Lei de recuperación de terras agrarias e chamada “moratoria do eucalipto” é indicativos desta situación. “A xente que vive no rural e do rural podemos ver tódolos dias que a eucaliptización da Terra Chá (e de Galicia en xeral) non é xa só un problema paisaxístico, senón que tamén se converteu nun problema ambiental, social e nun futuro converterase nun problema económico”, indica.
Un problema que, di, leva ao abandono do rural e o éxodo da poboación ás cidades. “Isto xa está a acontecer nas comarcas da Mariña e Ortegal, onde atopamos o maior número de aldeas abandonadas de Galicia e onde podemos ver aldeas coa totalidade dos seus terreos de cultivo plantados a eucalipto imposibilitando así o retorno ao rural e supoñendo a sentenza de morte final para esas aldeas”, critica.
Terra Chá Sostible fala xa de “desastre ecolóxico e social” e di que a”boom” de plantacións, sobre todo de eucaliptos, supón un “desastre económico, nefasto para o rural galego”.
