O pleno municipal do Concello de Lugo acordou por unanimidade reclamar ao Estado o diñeiro do IVE que lle debe a Galicia. Socialistas e nacionalistas votaron a favor da moción do PP para esixir a Pedro Sánchez a devolución da débeda.
A pesar desa actuación do bipartito na sesión deste 30 de xaneiro, os populares pensan que é “un paripé de cara á galería“. “Saben que o seu xefe de filas non vai devolver os cartos que pertencen aos galegos”, afirmou o voceiro local do PP , Ramón Carballo.
O BNG tamén se sumou á reclamación. A formación nacionalista fora a primeira en instar á Xunta a demandar esta débeda por vía xudicial, algo que finalmente así sucederá. E é que Feijóo confirmou onte que acudirá aos tribunais para esixir o pago dos 200 millóns derivados da mensualidade do IVE de decembro do 2017.
