O colectivo animalista Libera critica que a Xunta de Galicia autorice previsiblemente este sábado 8 un novo “campionato” para “exterminar raposos”. Desta volta, desenvolveríase entre os concellos de Portomarín, Guntín, Monterroso e Paradela. Segundo eles, é unha maneira de “camuflar” unha “macrobatida” coma se fose unha actividade de carácter deportivo.
A asociación asegura que “por quinta vez nas últimas semanas, nin o executivo autonómico nin os promotores destas cacerías advertiron con tempo suficiente á cidadanía das súas pretensións”. Aos seus ollos, iso supón unha nova vulneración da Lei de Emerxencias de Galicia.
Así mesmo, Libera lembra que xa se teñen realizado outras “pseudocompeticións” similares nesta mesma zona en anos anteriores. Na do 2019, din, un cazador resultou ferido tras enredarse nuns arames e dispararse nunha perna. “Iso evidencia o escaso control das autoridades polas zonas nas que transitan persoas con armas de fogo“, engaden dende o colectivo animalista.
Por outra banda, tamén censuran que a Administración considere que matar raposos é un deporte, “equiparable a calquera encontro de tenis ou de baloncesto”.
