Así reaccionou a política lucense e galega á moción de censura

Os representantes públicos de Lugo e Galicia deixaron versións moi dispares do acontecido na moción de censura – EU lembrou a xestión de Mariano Rajoy en Galicia – Tan só En Marea e o BNG reivindicaron unha maior presencia galega na política estatal

Por
Redacción
-
Gonzalo Caballero celebrou a vitoria na moción de censura de Pedro Sánchez | En Esquerda Unida lembraron a xestión de Mariano Rajoy en Galicia

O éxito da moción de censura presentada polo Partido Socialista contra o executivo de Mariano Rajoy non ten precedente na historia democrática española. Os representantes públicos de todo o estado centran a atención no novo presidente do goberno, Pedro Sánchez, que recibiu a confianza do Congreso dos Deputados. Entre celebracións e críticas, apenas houbo espazo para as reivindicacións de Lugo e de Galicia. Estas foron as reaccións dos políticos máis relevantes da contorna lucense.

 

Na dereita, sintomática ausencia de Galicia

Silencio da presidenta do Partido Popular en Lugo, Elena Candia, e tamén do delegado territorial da Xunta na provincia, Jose Manuel Balseiro. Os populares galegos, en xeral, limitáronse a compartir a solemne despedida do xa expresidente Rajoy. O secretario xeral Miguel Tellado tampouco se pronunciou sobre a moción de censura. Quen si compareceu publicamente foi o presidente da Xunta. Alberto Núñez Feijóo dixo estar “a disposición de Galicia e do partido, pero de Galicia”. E fora do eido autonómico, apareceu o lucense e voceiro do Partido Popular no Senado, José Manuel Barreiro.

En Ciudadanos houbo moita actividade, mais toda enfocada á estrutura de comunicación centralizada característica da formación laranxa. Dende o perfil de Olga Louzao, voceira en Galicia amais de na cidade de Lugo, e o de Ciudadanos Galicia fixeron eco das reaccións dos persoeiros máis importantes do partido en Madrid. A última mensaxe de Louzao data de onte.

 

A esquerda, entre a celebración e a reivindicación

Festa, e non é para menos, no Partido dos Socialistas de Galicia. O secretario xeral do PSdeG tivo moita presenza nas redes sociais durante a moción, á que foi convidado e observou dende o anfiteatro. Porén, non houbo oco para os asuntos galegos nin os propios de Lugo. É un día adicado ao líder e novo presidente do goberno, Pedro Sánchez. Así o plasmaron Gonzalo Caballero e a alcaldesa de Lugo, Lara Méndez.

A outra forza con presencia galega no Congreso, En Marea, salientou o valor dos seus cinco deputados para que a votación saíra adiante. O parlamentario Miguel Anxo Fernán-Vello foi o encargado de representar na tribuna ao grupo confederal, e tamén logo na rolda de prensa, que serviu para escenificar a súa participación. Tamén houbo mensaxes dende a representación de En Marea no Parlamento de Galicia, cun Luís Villares que centrou o discurso en vencellar a derrota do Partido Popular coas perspectivas do actual goberno da Xunta. E os aliados de Esquerda Unida tiraron de hemeroteca para lembrar o papel do presidente censurado na xestión do Prestige.

Finalmente, a principal reivindicación correspondeu ao Bloque Nacionalista Galego. O voceiro do BNG en Lugo, Rubén Arroxo, comparou as mencións durante o debate a Euskadi e Catalunya coa ausencia de Galicia. Na mesma liña foi a representante do Bloque no Parlamento galego, Ana Pontón, a primeira en solicitar ao novo presidente unha liña de acción para o país.

NOVAS RELACIONADASMÁIS DO AUTOR

DEIXAR UN COMENTARIO

Please enter your comment!
Please enter your name here