A solicitude para participar nos cursos Lugowork finaliza o 30 de xuño. Este programa consta de cinco accións de formación a cargo da Deputación, pensadas para lucenses menores de 30 anos.
Os participantes terán, segundo informou a institución provincial, a posibilidade de traballar en entidades da provincia. A actividade formativa permitirá cubrir as necesidades vencelladas a cinco eidos: técnica de automoción e agrícola, vendas online e offline, manexo de drons, emprendemento e desenvolvemento de aplicacións Android.
Este plan de emprego xuvenil foi posto en marcha polo goberno provincial con dous millóns de euros de orzamento, fondos provintes da Unión Europea a través da Escola de Organización Industrial.
As persoas interesadas en participar nestes cursos teñen ata o 30 de xuño para facer a súa solicitude en www.deputacionlugo.gal ou en www.eoi.es. Deberán estar inscritos no Rexistro de Garantía Xuvenil.
accións formativas
1.- Curso de auxiliar de ventas online e offline e atención ao público: Nesta acción formativa, que conta con 15 prazas, os alumnos recibirán 250 horas de formación a través de contidos dirixidos a habilidades sociais e de comunicación, ofimática e técnicas administrativas básicas e coñecementos sobre ventas online e offline.
2.- Aplicacións e Manexo de Sistemas Aéreos non Tripulados – Drons: Este curso conta con 220 horas de formación e 15 prazas. Son impartidos en Lugo por profesionais do aeroclub de rozas. Con esta acción o organismo provincial cubre a necesidade de formación nun dos nichos de mercado en expansión con máis posibilidades de crecemento.
3.- Curso de Emprendemento: Está dirixido a 15 persoas que teñan unha idea de negocio e queiran montar unha empresa. Deste xeito, os participantes terán un titor asignado que os asesorará en aspectos coma os modelos de negocio, ou estratexias de vendas, entre outros. Este curso o impartirán profesionais da Fundación CELL.
4- Desenvolvemento en aplicacións Android: Esta acción formativa, que conta con 15 prazas. Nesta acción formativa, que conta con 15 prazas, os alumnos recibirán unhas 200 horas de formación a través de contidos dirixidos a aprender todo o relacionado co desenvolvemento nativo de aplicacións Android para poder crealas dende cero.
5– Técnico en automoción e de maquinaria agrícola: Neste curso, 15 lucenses recibirán unhas 250 horas de formación a través de contidos dirixidos a aprender operacións básicas de mantemento no motor e sistemas auxiliares en automóbiles e maquinaria agrícola, proporcionando os contidos teóricos e prácticos necesarios nesta rama.
