O Club Voleibol Emevé Lugo anunciou a fichaxe da colocadora búlgara Ivelina Avramova, de 1.75 metros de estatura e 20 anos. Procede do Haro Rioja Voley, onde xogou a tempada pasada na Superliga 1, categoría na que vai competir o Emevé a vindeira campaña. Entre 2014 e 2017, defendeu as cores do Voley Playa Madrid, co que gañou a Copa de Madrid. Ivelina Avramova comezou a xogar ao voleibol aos 12 anos. Aos 14, chega a Madrid e ficha polo Club de Voleibol Angry Hornets de Colmenarejo. Un ano despois, é elixida como unha das mellores 14 xogadoras cadetes de Madrid. Con 16 anos, ficha polo Voley Playa Madrid.
Segundo o Emevé, é “un bo reforzo con experiencia na Liga Iberdrola” que lles fará “máis fortes”.
Hoxe en día, o Emevé conta en plantilla coa central Anllelivis Caballero, a receptora Lucía Prol, a líbero Eliana González, a colocadora Carmen Saá e a aposta Julia Paradela.
O club lucense comezará a tempada o sábado 12 de outubro en Las Palmas contra IBSA CV CCO 7 Palmas.
