Castroverde queda sen as festas do Santiago, que “marcarían un antes e un despois”

A comisión viuse obrigada a suspender o evento, pero non pecha a porta a organizar algunha actividade pequena en caso de que a pandemia evolucione favorablemente. De momento, "todo está no aire".

Integrantes da comisión de festas de Castroverde posan diante da casa do Concello co cartel do 2019 | ALX

A comisión de festas de Castroverde publicou este mércores nas súas redes sociais un comunicado no que confirma a suspensión do Santiago 2020 por mor da situación derivada da pandemia.

Como xa supoñían boa parte dos veciños do concello, as condicións incertas da crise do coronavirus para o mes de xullo non permitirán celebrar as festas patronais, que pivotan arredor do Día do Apóstolo. Ao non estar clara a evolución da enfermidade nin tampouco os requisitos para os festexos ao aire libre, a comisión viuse na obriga de anular un evento no que cabería esperar grandes aglomeracións de xente.

“Non queremos organizar unhas festas das que non poida gozar todo o mundo por problemas de espazo ou outras limitacións”, explican nas súas redes sociais. Saben que “a situación económica non é a mellor”, polo que entenden que “tampouco é o momento de pedir donativos aos comercios ou veciños”.

Con todo, dende a comisión non descartan poder facer “algo pequeno” para a veciñanza o día propio do patrón, o 25 de xullo, “aínda que sexan dúas charangas pola vila”. Sería unha maneira de non esquecer a festa e de xuntarse uns e outros, “non ao grande, pero como se poida”. Iso si, de momento “está no aire” e todo dependerá de como evolucione a pandemia e do que permitan as autoridades sanitarias.

O que é seguro é que os integrantes da comisión xa comezarán a traballar axiña para que o Santiago 2021 non defraude. As festas do 2020 “marcarían un antes e un despois, con moitas sorpresas”, pero virán outras en mellores circunstancias.


“Cando che gusta onde vives e queres facer cousas pola túa vila, paga a pena ser da comisión de festas”

DEIXAR UN COMENTARIO

Please enter your comment!
Please enter your name here