Lugo “saldará unha débeda histórica coa figura de Castelao” ao colocar unha estatua na súa homenaxe na rúa da Raíña, xusto en fronte do Hotel Méndez Núñez. Será tamén unha maneira de conmemorar o 100º aniversario da revista Nós.
O tenente de alcalde, Rubén Arroxo, informou de que a xunta de goberno do Concello aprobou este mércores iniciar o procedemento de compra da estatua de Castelao, “unha das persoas máis importantes da historia e da cultura” de Galicia.
A estatua colocarase onda o Hotel Méndez Núñez, lugar “onde se realizou a cea posterior á I Asemblea Nacionalista de Lugo no 1918, na que Castelao estivo presente”.
Rubén Arroxo vinculou esta actuación coa “acción global do goberno municipal para revitalizar a estética da cidade e encher Lugo de cultura”. Puxo como exemplo a restauración das placas dos escritores e escritoras do centro da cidade ou o traslado do busto de Xoán Montes á praza Maior.
