Piden investigar as supostas fugas da cementeira Cosmos

Bierzo Aire Limpo recolle as denuncias da veciñanza de Toural dos Vaos sobre as emisións da cementeira Cosmos por un posible delito ecolóxico

Cementeira en Toural dos Vaos (O Bierzo) | Cosmos

Logo da aparición dunha extensa columna de fume e partículas sobre Toural dos Vaos, a veciñanza do concello berciano puxo os feitos en coñecemento das autoridades. Os avisos realizados perante o 112 e mailo Seprona da Garda Civil foron recollidos pola organización sen ánimo de lucro Bierzo Aire Limpo, por se existise un delito ecolóxico.

Esta emisión descontrolada procedía da cementeira Cosmos, e segundo os vídeos difundidos polas testemuñas, prolongouse por case media hora. Segundo o colectivo ambientalista, a empresa dixo que o episodio foi “un escape inofensivo”. Esta versión non convence a Bierzo Aire Limpo, que advirte da impunidade desta corporación “que carece de credibilidade entre os cidadáns”.

“Isto foi máis ca un escape, foi unha fuga fóra de control”, aseguran na organización ecoloxista. “Se isto acontece cando queiman clinker –compoñente principal do formigón–, que pasaría cunha fuga semellante incinerando pneumáticos e outros residuos?”. Precisamente, a polémica arrodea a Cosmos pola solicitude de permiso para queimar estes elementos, para os que xa prepararon as instalacións.

Contra esta solución, cualificada polo xornalista especializado en medio ambiente Valentín Carrera como “unha barbaridade”, existe agora mesmo unha campaña que leva recollidas máis de 6.000 sinaturas, e que remata o 28 de agosto. A Xustiza xa tumbou no pasado a autorización para queimar pneumáticos como combustible na cementeira Cosmos.

“O perigo dunha nube tóxica é unha ameaza intolerable sobre os nosos campos, froiteiros e vides, e sobre a saúde dos bercianos e bercianas”, censuran dende Bierzo Aire Limpo. É por iso que esixen unha investigación inmediata, levada a cabo por unha autoridade imparcial, obxectiva e independente. “Non nos fiamos nin de Cosmos nin das medicións da Junta de Castilla y León”.

O Bierzo quere ser a nova A Rioxa

1 COMENTARIO

DEIXAR UN COMENTARIO

Please enter your comment!
Please enter your name here