O plan director do Corredor Atlántico presentado polo Ministerio de Fomento foi recibido con optimismo na plataforma Parga Non Se Divide. A mellora no ferrocarril de mercadorías no noroeste inclúe melloras complementarias na liña Lugo-Ferrol, o que supón “unha boa oportunidade para incluír a variante”, que hogano Adif non contempla.
Consta no plan director a recepción de 370 millóns de euros das arcas estatais durante 2019 para a mellora do ferrocarril de mercadorías no noroeste. O total a investir neste sector é de 3.500 millóns de euros co obxectivo de que en 2025 circulen convois de ata 750 metros, con máis velocidade, máis seguridade e mellores instalacións.
A conexión Lugo-Ferrol, que divide Parga na actualidade, non é prioritaria, mais terá actuacións complementarias nos 275 quilómetros para igualar o mínimo indispensable, co importante fito da electrificación completa na liña, que situaría a Galicia como a primeira comunidade con todas as vías electrificadas a 25 kV. A idea é aproveitar estes traballos para facer realidade a variante, demanda relacionada co escaso partido que obtén o pobo do tren en relación coa inseguridade e o prexuízo sobre os valores patrimoniais.
Malia non ser un dos obxectivos fundacionais, a plataforma logrou unha estimación do custe da variante. O enxeñeiro e experto en infraestruturas ferroviarias Xosé Carlos Fernández estima entre 4 e 5 millóns de euros o investimento necesario para sacar o ferrocarril de Parga, cumprindo cos “criterios de modernización, redución de tempos de viaxe, aumento de velocidade, aforro e seguridade” do Corredor Atlántico, que suporá de media 1,2 millóns por quilómetro.
Así, Parga Non Se Divide esixe a Adif que se pronuncie sobre esta posibilidade, que implicaría abandonar o actual plan de supresión de pasos a nivel. “Hai un sentimento maioritario de rexeitamento”, explican na plataforma, que está en proceso de consolidación formal. Anuncian que o primeiro paso será solicitar a xuntanza con Fomento e o administrador ferroviario, que dirixe a lucense Isabel Pardo de Vera. “Non podemos agardar máis. Queremos coñecer cal é o futuro do noso pobo”.
