Investigacións levadas a cabo por membros da Brigada de Policía Xudicial da Policía Nacional de Lugo, coa colaboración de indicativos de Seguridad Ciudadana, conseguiron deter a dous homes considerados os autores do furto de teléfonos móbiles de alta gama.
Segundo informa a Policía Nacional, durante as pasadas festas de San Froilán estaba a detectarse un incremento de furtos de teléfonos móbiles en locais de lecer da cidade. Por esta razón por parte da Comisaría Provincial de Lugo procedeuse ao establecemento dun dispositivo para a localización dos autores.
Froito desta operación, tras ser detectados polos membros do grupo de investigación, coa colaboración duns indicativos de radiopatrullas, logran interceptar e deter aos autores, con varios dos terminais roubados, sendo postos a disposición da autoridade xudicial.
A Policía Nacional non descarta que poidan estar implicados en máis feitos similares polo que a investigación segue aberta. Ata o momento, recuperáronse cinco terminais de telefonía móbil, valorados nuns 5.000 euros.
