Este fin de semana os guitiricenses teñen unha cita ca poesía. O sábado ás 12 horas a rexedora dará saída á primeira edición do Festival de Poesía Guitirica co saúdo institucional. Ás 14 horas Alfonso Blanco Torrado, impulsor de Xermolos e da posta en valor de Díaz Castro, será o encargado de dar o pregón.
Durante estas dúas xornadas haberá presentacións literarias como a da revista NPG Gazeta, palestras sobre Carvalho Calero e Xela Arias ou libros como “Non estamos preparados para medrar” de Teresa Ríos. A música e a poesía tamén estarán presentes durante todo o festival e tamén haberá recitais poéticos en diferentes puntos das rúas da vila, para achegar a poesía a toda a cidadanía.
O domingo realizarase ás 10:30 horas un roteiro de Díaz Castro ao que se pode anotar a través do correo electrónico biblioteca@concellodeguitiriz.com e ás 19:00 horas como peche do festival terá lugar a entrega de premios do certame poético “Vilariñas”.
Ao longo do festival participarán, tanto nos recitais poéticos como nas presentacións literarias, integrantes de diferentes agrupacións poéticas de todo o territorio galego.
