Dúas persoas tiveron que ser evacuadas tras resultar feridas ao explotar un bote de aerosol que se atopaba preto da lareira dunha casa de Begonte.
Segundo informa o CIAE 112 Galicia, a central de emerxencias recibiu unha chamada ás 14,30 horas por parte da Garda Civil, que solicitaba a intervención dos bombeiros para extinguir un incendio provocado por unha explosión rexistrada nunha lareira de vivenda de Santa Marta, na parroquia de San Fiz de Cerdeiras.
A consecuencia da deflagración, dúas persoas tiveron que ser trasladadas polos profesionais de Urxencias Sanitarias 061 ao Hospital Clínico Universitario de Lugo.
O equipo de extinción logrou apagar as chamas e confirmou que a orixe da explosión foi un bote de aerosol que se atopaba á beira da lareira.