O alcalde da Pastoriza, Primitivo Iglesias, móstrase “moi preocupado” polo gromo de coronavirus detectado na residencia de Bretoña.
Este xoves, a Xunta informa de que hai dez positivos na residencia -oito usuarios e dous profesionais-, aínda que o rexedor eleva esa cifra a “entre 18 e 20 afectados”. “O pasado sábado pola noite chamoume a directora (da residencia) para dicir que había uns cantos residentes que eran positivos de coronavirus”. Agora estase á espera de facer PCR “aos que quedan alí, porque os enfermos foron trasladados a Santiago”.
O alcalde da Pastoriza non oculta que “hai unha preocupación” entre os veciños, para engadir que “o Concello estivo e está a disposición do que considere adecuado a residencia”. “Hai unha preocupación notable porque non só son os enfermos, aos que desexamos unha pronta e satisfactoria recuperación, senón tamén porque a maior parte das traballadoras son do municipio”, explica Primitivo Iglesias.
